مساء الخير ✋كيفكم؟ اليوم حبيت اتكلم عن بودي شوب ومنتجاته بما انه كنت طالبة في الجامعة وكان في كشك لمحل بودي شوب فكنت دايما اشتري منهم واختبرت بعض الاشياء اللي صراحة ماكنت حشتريهاولايخطر على بالي اني اجربها . خليني أتكلم شوية عن بشرتي بشرتي حساسة بالذات بشرة الوجه ماتتقبل أي برودكت ولكني جربت بعض الاشياء أول برودكت اشتريته كان الزبدة
زبدة الجسم
تتطلب عرض الشرائح هذه للجافا سكريبت.
عجبني قوامها مررة لاهو ثقيل ويتعب ولاهو سايل مررة وبرضه يعذبك قوامه بين الاثنين والريحة جدا جميلة انا دايما استخدم زبدة الشيّة لانها مفيدة وغير كده البشرة تمتصها بسرعة ماتخلي جسمك يدبق ويزعج بس هذه المرة جربت بالكاكاو وبرضه حلوة
هذا اتعب واقلكم يجنن يجنن يجنن مرة مفيد للحبوب يعالجها ويخليها ماتكبر وتهيج ويطهرها معروفة شجرة الشاي بفوائدها ونفس الوقت قوية عالبشرة فخليكم حذرين انا الحمدلله ماقد عملتلي حساسية لاني استخدمها بطريقتين الطريقة الاولى اغسل وجهي بغسول وبعدين احط كريماتي اليومية وعلى الحبة نفسها احط شوية من زيت الشاهي على طرف اصباعي واحطها عالحبة نفسها تحسوا بحرقة بسيطة جدا هذا دليل على ان المادة بتشتغل وتعطي مفعولها الطريقة الثانية اغسل وجهي واحط كريماتي وكل شيء بس اجي للمرطب احط في يدي شوية كريم ونقطتين من زيت الشاي واخلطهم واحطهم على وجهي . طبعا استخدمه اذا حسيت انه حتطلعلي حبوب ولخبطت في نظامي الغذائي أحطه . بس اذا ماتعاني من أي شيئ وقتها وماتحتاجي فلا تحطي لانه مايحتاج يعني الاستخدام وقت الضرورة
حبيته مرة ولاحظت انه ريحته حلوة مو زي باقي المزيلات اللي تحسي انه كلها كيماويات وتنشف الاضافر هذا تحسي فيله زيت اللوز يرطب الاضافر ويرطب حواف الأظافر ( الجلد ) و ماينشفها وريحته حلوة وطبعا يشيل المناكير على طول حبيته مرة
تتطلب عرض الشرائح هذه للجافا سكريبت.
هذا حكاية تانية جربت مزيلات كثيرة من الصيدليات منها بخاخ ومنها ستيك وحتى البودرة الطبيعية جربتها وكلها حسستني وعملتلي حكّة وماتريح الواحد قلت اجرب هذا سمعت انه طبيعي ومكوناته طبيعية ومفيدة وغير كده يئدي الغرض. فاشتريته هو غالي شوية عن المزيلات اللي في الصيدلية بس قلت اجربه وبعد ماجربته لا أحكيلكم كل شيء فيله حلو يئدي الغرض ومايسبب حكة ولا احمرار في المنطقة وسهل استخدامه لانه ستيك ويجلس معاي مدة طويلة لانه العبوة حجمها مرة كويس والسعر مقبول مقارنة بكل الفوائد في منه روائح متعددة بس انا اخد اللي بالصبار مررة ارتحت عليه ومعروف الصبار مفيد واخده بدون عطور ورائحة لانه العطور معروفة تهيج وتحسس المنطقة فابتعد عن الاشياء اللي فيها روائح.غير كده مايدبق المنطقة أو نفس البرودكت مايتقشر عالجسم . قوامه قوام كريم خفيف مرة عالجسم وتمتصه البشرة لا يخلف وراه لا بودرة ولا ملمس غريب
تتطلب عرض الشرائح هذه للجافا سكريبت.
ظلال العيون كمان من الاشياء اللي دايما استخدمها الوانها جدا تعجبني اشتريت اثنين تقريبا نفس الالوان بس وحدة اقدر افصلها عن بعض وتجي زي المربعات اذا كنت مسافرة او شيء اقدر اخد اللي ابغاه والتانية باليت وكمان صغير ونحيف سهل انه ينحط في الشنطة انا احب درجات البرونز مررة . الالوان فيها لمعة بس مررة خفيفة وحلوة تقدري تستخدميها لكسرة العين او جفن العين . أحب احط اللون البني على عضمة العين عشان احددها واحط عالجفن المتحرك لون برونزي ومن النص ممكن احط لمعة وبس احط محدد للعين واحط
المسكرة عندهم مسكرتين حبيتها مرة وحدة تطول الرموش مررة انا الحمدلله رموشي طويلة بس مهي كثيفة خفيفة بس تطولي هي اكثر ومضادة للماء تقعد ثابته حتى لو دخلت المسبح واشيلها بمزيل مكياج من مكوناته الزيت لانه الزيت يكسر البرودكت ويشيله بدون مايئذي الرموش والمسكرة التانية تكثق بس بشكل طبيعي لاني احب المظهر الطبيعي فدايما ألجألها للمكياج اليومي. بس هذه مه مضادة للماء مااعرف اذا في منها نوع مضاد للماء او لا
اول فرشة مررة عملية استخدمها لمن احط الاساس امد الأساس على بشرتي بالفرشة . تخلي الأساس ينمد عالبشرة بسرعة وبتوزيع متناسق وغير كده تتغسل وتتنضف بسهولة وماتتكسر وماتتفتفت شعيراتها وتفدري كمان تغطيها وتحافظي عليها تقدري تستخديما للبلشر والكنتور او اي شيء بس انا احب استخدمها للاشياء الكريمي لانه نفس شعراتها قريبة من بعض وتنفع لكريم الاساس او البلشر السائل او الكريمي . للأسف ماقدرت ألاقي الرابط حقها عشان تقدروا تشتروها وتشوفوا السعر . امما الفرشة التانية حلوة للبلشر لانه مسكتها طويلة وشعراتها كده خفيفة وتوزعلك اللون بشكل حلو فتنفع للبرنزر والكنتور والبلشر والهايلات طبعا الباودر. وبرضه سهل غسلها وتنضف بسرعة شعراتها ماتطيح ولاتتكسر في فرش كيرة مرة عندهم كمان للعين والأساس بس لسا ماجربتها
الماسك مررة يهبل عبارة عن ماسك يدخل لجوة البشرة وينضفها من الاوساخ ومن اول استعمال تحسي البشرة نضيفة ونضرة وتفتح شوية مع التنضيف. وينفع كمان سكراب في نفس الوقت لانه فيله زي الحبيبات الصغيرة ممكن تحطيه على وجهك كماسك لمدة ٧ دقايق وقبل ماتشيليه تحطي في اطراف اصابعك شوية موية وتفركيه وتعملي لوجهك صنفرة وتفركي الوجه بشكل دائري وخفيف وبعدين تشيليه بالموية مررة جميل الماسك . يخرج الأوساخ من أعماق البشرة ويساعد أنه يشيل شوية من الرؤوس السوداء مايقضي عليها تماما ولكنه يساعد شوية
تتطلب عرض الشرائح هذه للجافا سكريبت.
هذا الغسول جدا حلو وجميل ويساعد اللي يعانوا من حب الشباب لانه من مكوناته زيت الشاي بس ماانصح انه يلامس العين لانه ممكن يحرق العين هو غسول مه مزيل مكياج بعد ماتزيلي المكياج تقدري تغسلي وجهك بهذا الغسول وتفركي الوجه مايعطي رغوة كثيرة لانه مكوناته طبيعية ويساعد من الحد من حب الشباب. ريحته زيت شاي وهو عبارة عن سائل اخضر فاتح اللون وخفيف. انصحه مررة للي عندهم حب الشباب
HANEEN KALTHOM 